تمرة لكل مصلي!!!!!

رمضان بكره ان شاء الله

كل سنه وانتم طيبين

شهر فيه ليله خير من الف شهر ..

اكيد كلنا نفسنا يبقي رمضان غير

ان شاء الله شويه عزم كده واراده وهيبقي غير اي رمضان ان شاء الله

جبت طبعا ياميش رمضان؟

وطبعا جبت التمر واللذي منه؟

وطبعا منستش تجيب سكر وملح والحاجات دي التموين يعني؟

اكيد لانك مش هتقدر يا عيني وانت صايم والدنيا حر ووتعبان كمان تنزل تجيب الحاجات دي..

طبعا كلنا استعدينا..

فكرت في نفسك كتير مش كده

مفكرتش ان هيبقي في شخص واحد محتاج حاجه واحده من كل اللي انت عمال تجيبه..

مبقولكش كده علشان تتضايق من نفسك ان كنت طول عمرك بتفكر بس في نفسك

فلازم تفكر في غيرك

لازم تعرف انه عايز يبقي مرتاح علشان يقدر يقرب من ربنا الفتره دي.. اللي انت طول عمرك بتتمناها علشان تشيل ولو شويه ذنوب من عليك

لازم تفكر في الناس

مش عشانك...

لالالا

علشانهم هم ..

واعتقد ان ده هدف اسمي ..

هتقولي هعمل ايه ؟!

هديك ابسط ابسط الامور علي الاطلاق..

التمر..

شايف الحبه دي قد ايه صغيره

هعتبرك بتصرف 10 جنيه يوميا

ولو اني اشك حتي لو انت انسان عاطل

بس ما علينا

وفر منه جزء جزء صغير اشتري علي الاقل كيلو كل 3 ايام

طيب هتعمل بيه ايه

اقولك قسمه مثلا كل 4 او 5 تمرات في كيس منفصل

وبعدين ..

جيت للحسنه التانيه اللي هتعملها

المره دي لنفسك

هتنزل تصلي المغرب

فاكر زمان

زماان..

كنت بتستني الفطار وبتضرب بالصلاه في المسجد عرض الحائط

لا الشهر ده بلاش

خد الاكياس اللي انت قسمتها وانزل

هتلاقي ناس كتيييير قوي مستنيه آذان المغرب في المسجد

عارف الناس دي ايه

1- يا اما ناس حالتهم كويسه بس ايمانهم اكبر ونازلين يصلوا

2- اما ناس مسافره ولازم تدخل تصلي

3-اما ناس حالتهم علي قدهم ودول اكيد بيبقوا مستنين ولو معونه صغيره يقدروا بيها يعيشوا

شوف هيبقي في علي الاقل عشره من الانواع دي في المسجد

تخيل انكـ فطرت كل واحد منهم

تخيل شوف قد ايه منهم محتاج التمره دي

علشان يكسر صيامه

متبصش لحسناتك قولتلك من البدايه بص للي هتعمله للناس دي

يكفي لحظه مشاركه وجدانيه

ورمضان في الاساس عند ربنا شهر بيقرب فيه العباد من بعض بيحسسهم كل واحد بمعاناه التاني

طبعا الشهر اتغيرت ملامحه في الاونه الاخيره

زي ماا كل شيء اتغير ملامحه

بقي استعدادات بالمحمر والمشمر وحاجات بنشوفها كده بمجرد النظر بترفع نسبه الكوليسترول في الدم

يبقي تعالوا نعمله رمضان غير

عارفه ان اللي بقوله حاجه صغيره قوي مشروع التمر ده

في حاجات كبيره جدا في رمضان ممكن نعملها

بس خلونا نبتدي واحده واحده

يلا اوعد نفسك بقي واوعد ربنا انك تبتدي من النهارده

مشروع افطار صائم

طبعا هو مش افطار ده مجرد بدايه بس

والكلام ده ينفع لكل شاب او فتاه

طيب ازاي البنت تشارك

شاركي بجزء من اموالك وشجعي اخوكي او ابوكي علي العمل ده وادفعيهم انهم ينفذوه وكوني انتي جزء منه حتي لو بطريق غير مباشر

قد ايه هترتاحوا والله لما تحسوا ان انتوا ابتديتوا تفكروا في الناس زي ما بتفكروا في نفسكوا..

لنا عوده باذن الله ..

فنحن بأيدينا الكثير والكثير

ولكننا لا نراه

وصلي الله علي محمد صلي الله عليه وسلم

وكل عام وانتم في طاعه المولي عز وجل